Comunicado de la Sección Sindical de CSI
El 10 de febreru de 2011 facíamos públicu un comunicáu tituláu “RTPA, secuestrada
polos partíos políticos”, sobre una charra enmarcada nel Aula Popular José Luis García
Rúa.
Anguañu, tres de los asocedíos que se tán viviendo nes últimes selmanes na RTPA y los
que mos queden por vivir nes que vendrán, podemos dar de segures que nun almiten
duldes que permanecemos presos dʼuna situación de bloquéu provocada pola
incompetencia de la clas política pa iguar los problemes de la ciudadanía y nesti
casu los de los y les trabayadores de la RTPA y les empreses xuntaes a ella.
Trátase-mos como a daños collaterales, víctimes civiles ente una guerra de dos
exércitos interesaos namás na defensa de los sos propios intereses, na defensa de la so
victoria. Arriendes úsasemos como esculpa demientres somos conscientes de que yos
importamos un res tanto a unos como a otros.
¿Cómo llegamos hasta equí?
La RTPA nació hai casique 6 años. Desque entamó foi un proyectu arreyáu en tolos
sentíos a una dómina política col lideralgu del PSOE y con Tini Areces de cabezaleru,
sofitáu por IU y con un Partíu Popular domesticáu na oposición. Popularmente fuimos
conocíos como TeleTini. Nos entamos de la RTPA diéronse dellos enfrentamientos de
poder que pronto se iguaron cola entrada del PP nel Conseyu dʼAlministración.
Nesti tiempu circularon ente los nuestros güeyos, los de los trabayadores, too tipu
dʼactuaciones condenables lo mesmo dendeʼl puntu de vista llaboral como dendeʼl puntu
de vista del serviciu públicu: despidos, precariedá llaboral, amenaces del tipu “nun vas a
trabayar más nʼAsturies”, xudicialización de les rellaciones llaborales, incumplimientos
del conveniu, baxos salarios, autoritarismu internu, coches oficiales, contratos
amasuñaos que siempre ganaben los mesmos, esternalizar tarees que permitíen la
precariedá y el gastu, conformación dʼuna rede empresarial de calter combayono y
“peselveru”, empresarios esplotadores poniendo poco más “quʼel cazu”, control
informativu... por nun falar de dellos escándalos a nivel de programación y xestión como
el de la Fórmula 1, programes fechos en Madrid como “Asturies en 25”, el vetu a
personaxes carismáticos como Gerónimo Granda, o una parrilla na que los espacios de
producción propio cuéntense colos deos de la mano. Amás abulten les ausencias como
los alderiques, lʼanalís políticu y social, la información crítica, lʼhumor dʼactualidá (¿Qué
foi de Terapia de Grupo?), la programación musical o el documental y el reportaxe
asturianu... Too ello pasó ente los nuestros güeyos, sollertes, dividíos y resignaos,
mirando pa otru lláu cuando yera necesario. Al silenciu cómpliz de los partíos políticos
presentes nel Conseyu dʼAlministración habría que suma-y el de los grandes sindicatos,
la incapacidá de los pequeños y la resignación sumisa de los trabayadores.
¿En qué situación mos alcontramos?
Agora, dʼaquella política encontiada nel escesu y el grandonismu arecista, recoyendo
parte del descontentu y la indignación dʼesa etapa ya ensin una alternativa política ni a
esquierda nin a derecha, aterriza nel paisax políticu Cascos y el su nuevu partíu. Na
RTPA, magar que la salida dʼOrnia, exdirector xeneral, que yas les debió ver venir, nada
cambió y too se caltién. Lʼatrincheramientu faese evidente a lo llargo del branu. La
nueva realidá parllamentaria nun se ve semeyada nel control de la RTPA. El nuevu
Gobiernu, en minoría, ensin capacidá pa tomar el control nun mediu de
comunicación fuertemente arreyáu a una dómina política finada decide intervenir.
A la brava. En plena precampaña ellectoral. Recortando presupuestos aprobaos un
añu enantes. Amparáu por una crisis económica que ye brutal pal mou de vida que
conocimos y abellugáu tamién nel espilfarru y la mala xestión de la RTPA. El so cálculu
afítase nel camientu de que nun va pagar un coste ellectoral por esti tema y colocará nel
debate públicu un asuntu col que se siente cómodu: lʼesbarrumbe dʼun “chiringuito”
Arecista sobreʼl que, arriendes, cuenta con información abonda que puede dir esbillando
pa devolve-y tolos guelpes recibíos. Nada dʼalderiques sobre sanidá y educación; meyor
falemos de la RTPA y lo innecesaria que ye. Al entamu desmontámosla, procurar que
marchen les empreses, y colos rispios que queden ya veremos qué facer si ye que
dalguién (el parllamentu) quier facer dalgo.
La oposición acepta lʼapueste y xuega. Y a qué xuega. Pues a eso. A oposición.
A llanzay al Gobiernu piedres. Eso sí, nada de sentase a analizar lo que ta pasando y buscar
soluciones. ¿Pa qué? Hai unas eleiciones xenerales a la vuelta la esquina y meyor mos
dedicamos a facer cuentes a ver si los votantes de Cascos reconocen el su error. Y
depués de les eleiciones ¿qué? Pues ya se verá.
Tamién resulta valoratibleʼl papel de les tres cabeceres de prensa (LNE, El Comercio y
La Voz de Asturias), caúna averada con un partíu políticu diferente. Mentantu, nós a
sufrir: impagos, despidos ya duldes. La sangrina va ser grande y ya empecipió. Nun
escaecemos nesti sen a tolos compañeros que ya quedaron pol camín, que nun son
pocos, o los munchos que tovía angüañu siguen trabayando en condiciones de xuru
precaries. La llucha ente lo nuevo y lo vieyo (conflictu clásicu y retratáu abondo na
narrativa) tá siendo traumática pa la parte menos responsable ya indefensa: los y les
trabayadores.
Tampoco escapa a esti xuegu la Dirección de la cadena y el Conseyu dʼAlministración.
Nenguna autocrítica. La “partíucracia” manda y “el nuestru” deber yeʼl que ye, defender
lo indefendible y atacar al enemigu, a ver si-y quitamos votos. “¡Aguantaremos hasta que
mos echen!”, “¡esto ye una pelea ente la estrema derecha y la democracia, un guelpe de
estáu!”, declaren internamente. La oposición PSOE, PP ya IU, atrincheraos na RTPA y
con unos informativos al su serviciu, dispuestos a entrar dafechu como parte activo del
xuegu ellectoral. Lʼespectáculu ye ruín. Unos, atrincheráos nel Gobiernu y otros na
RTPA. Naide nun aporta soluciones reales, a naide parecen interesa-y.
A la oposición (PSOE, PP e IU) basta-y con falar de los puestos de trabayu, los
mesmos polos que nunca enxamás se preocupó, ensin entrar a valorar cuánta
responsabilidá tien na situación y qué posibilidaes tién dʼaportar soluciones. Foro
nun xuega coles cartes sobre la mesa. Nun tá desplicando qué ye lo que realmente
quier pa que se solucione la situación y el Gobiernu del Principáu tá contrayendo
unes deldes que tarde o tempranu tendrá que pagar (y con intereses). Si el conflictu
de la RTPA tién solución dalguna, tol mundu sabe que pasa por un alcuerdu na Xunta
Xeneral que permita algamar los 2/3 necesarios para decidir el futuru de la
radiotelevisión. Así lo diz la llei y así obligó el Gobiernu a que seya cola so decisión. ¿Por
qué nun se ponen dʼalcuerdu?¿Por qué nun lo intenten?¿Por qué nun busquen ya
mesmo soluciones?¿En qué midía mos afectará a los trabayadores un resultáu eleictoral
y otru? Camentamos que más bien nada. Too pinta que seguiremos fastidiaos, presos
dʼun xuegu dʼalta política que mos queda mui llonxanu, pero que decideʼl nuestru día a
día. Nós, los y les trabayadores, nun fuímos los quʼespilfarramos, nun fuímos los que
robamos, nun teníamos coches oficiales nin altos salarios, más bien tolo contrario, nin
xestionamos nin se mos dió la oportunidá de facelo. ¿Por qué tenemos que pagar los
platos dʼuna situación na RTPA y una crisis económica que nós nun provoquemos?¿Por
qué se mos fae responsables dʼuna xestión que nós tamién sufrimos?
¿Onde vamos?
Si nun llega una solución pronto el panorama ye mui duru. Si los trabayadores nun
reciben los sos salarios y se fae inviable la continuidá del serviciu hasta finales
dʼañu habrá cientos de trabayadores na cai o lo que ye tovía peor, trabayando
ensin cobrar, ensin saber cómo enfrentar los pagos necesarios pʼafrontar el día a
día. La RTPA podría amás acabar presentando un concursu dʼacreedores que produciría
un cese ¿temporal? de lʼactividá. ¡QUEREMOS UNA SOLUCIÓN Y QUERÉMOSLA
AGORA!
A mediu plazu, del 2012 y en delantre, el panorama sobre la RTPA y el sector
audiovisual nʼAsturies pinta igualmente oscuru. Coles amenaces de zarrar o privatizar
llanzáes pol propiu Cascos y lʼavance de les polítiques precarizadores del emplegu mos
vemos empobinaos a un trabayu tovía más sumisu, en condiciones de semi-esclavitú y
con unos salarios que van amenorgar. Hai amás tres escueles de formación nel
Principáu aportando cada añu mano dʼobra barata que nin la radiotelevisión nin el sector
audiovisual son capaces dʼabsorber y exercen una presión a la baxa nes condiciones
llaborales.
¿Qué podemos facer?
Teniendo en cuenta tolo desplicao, los trabayadores namás tenemos una salida:
esixir soluciones darréu a la grave situación dʼangüañu a quien les tién que dar: el
parllamentu. ¿Cómo? Faciendo ruídu y dexando nidio que nun vamos dexar que se mos utilice
nin por unos nin por otros, puesto quʼeso confúndelos na búsqueda de soluciones.
La llucha partidista ye una de les razones que bloqueen la situación.
Si la clas política defende los sos intereses de partíu, los empresarios defenden los sos
porgüeyos y la Direción y el Conseyu dʼAlministración defenden la so xestión. ¿Por qué
los trabayadores nun mos dedicamos a defender namás los nuestros intereses? ¿Por
qué mos dexamos arrastrar polos llamamientos a la unidá dʼacción del Director Xeneral?
¿Por qué mos cuesta soltar tantu llastre dʼuna xestión que nosotros mesmos sufrimos y
que nun quisiéramos volver a sufrir nel futuru? ¿Por qué dexamos que la nuestra llucha y
el nuestru sofitu social se venceye col sofitu a la xestión de la cadena? ¿Por qué
permitimos que los nuestros propios informativos xueguen con esti sofitu que tanto mos
tá perxudicando? ¡Basta de corporativismu!
Esta seición sindical nunca tuvo averada a la Dirección dʼangüañu nin lo tará nel futuru si
nun ameyora la so xestión y les condiciones llaborales. Pero creemos que nun sirve con
que nós lo manifestemos. Ye necesario ya imprescindible quʼel desmarque se faiga de
manera coleutiva. Que la imprescindible esixencia de soluciones a los grupos
parllamentarios vaiga acompañada dʼuna sensibilización social que mos quite la
responsabilidá sobre lo que pasó equí, pasa y de xuru seguirá pasando. Entós
podremos falar con más llibertá y ser más firmes na nuestra llucha.
Que se acabe darréu col atrincheramientu de los actuales xestores quʼensin dulda
dalguna nun tá aportando a solucionar la situación. Que los grupos parlamentarios
se pongan dʼalcuerdu sobreʼl futuru de la radiotelevisión cuanto enantes y quʼel
Gobiernu del Principáu igue los pagos darréu.
Que los trabayadores nos desmarquemos claramente de la Dirección de la RTPA nun ye
namás por xusticia. Ye la única forma que tenemos de forzar el desbloqueu de la
situación. Facer quʼalgo se mueva. Si forzamos a los políticos a que nun nos usen de
manera partidista, dalguna manera taremos forzándolos a que busquen soluciones.
La gravedá de la situación nun mos puede facer perder de vista la defensa dʼun
serviciu públicu que bien xestionau y llevando a la práctica dʼuna manera real los
sos oxetivos puede ufiertar a la sociedá asturiana un serviciu dʼun valor
económicu, cultural y social bayurosos. Algunes dʼeses potencialidaes ya se
demostraron a lo llargo dʼestos años con experiencies como les de La Marquesina,
Samba, el chigure y versión asturiana..., programes como Presta asgaya, Camín de
cantares, Mochileros, La mar de Asturias o Conexión Asturias, indiscutible vertebrador
territorial que pone en valor al invisible mediu rural asturianu. Les retransmisiones del
deporte base. Lʼapueste pola programación nʼasturiano y la difusión musical na radio. La
importancia de tener unos bonos informativos altavoz de los problemes sociales,
políticos ya económicos. Exemplo haberlos hailos, ya idegues a mil. Hai que dexar
trabayar a los profesionales, periodistes y creativos con llibertá. ¿Puede facese con
menos perres y meyor? Tol mundu diz que ye así. Que se faiga. Pero que nun se ponga una y
otra vez un mediu de comunicación públicu, financiáu colos nuestros impuestos, al
serviciu dʼintereses partidistes, al serviciu del Gobiernu de turnu o los empresarios ensin
escrúpulos. Convirtiéndomos a los trabayadores en mercancía nes manes caprichoses
dʼunos y dʼotros. ¿Puede reactivaseʼl sector audiovisual y que nun seya dependiente
namás y esclusivamente de la RTPA?, que se faiga tamién. Queremos trabayar nun
entornu caracterizáu pola profesionalidá y les condiciones de trabayo dignes, a lo
mínimo con respetu a la llexislación llaboral. La necesidá de dotar al sector audiovisual
asturianu dʼun conveniu coleutivu propiu tamién debería entamar a asitiase nes nuestres
mientes, magar quʼangüañu seya difícil mirar más alló del mes que vien.
Debemos salir a la cai, de la manera más ruidosa posible y de manera costante a
defender que la xente que nun cobra lo faiga y a defender los nuestros puestos de
trabayu (los de toos y toes), teniendo en cuenta quʼhai quʼapilancar les bases para day una
continuidá a les nuestras demandes. Lo que pasó equí demientres los caberos
años nun debiera volver asoceder enteʼl silenciu y la resignación de los propios
trabayadores.
¡RTPA SOLUCIÓN DARRÉU!
Comentarios